Свята-Пакроўская царква (Вейна)

Праваслаўны храм
Свята-Пакроўская царква
53°49′40,43″ пн. ш. 30°23′19,26″ у. д.
Краіна	Беларусь
Аграгарадок	Вейна
Канфесія	Праваслаўе
Епархія	Магілёўская і Мсціслаўская
Благачынне	Магілёўскае раённае
Архітэктурны стыль	класіцызм
Дата пабудовы	1-я палова XIX стагоддзя
Статус	Гісторыка-культурная каштоўнасць Беларусі, шыфр 512Г000488
Стан	дзейнічае
Медыяфайлы на Вікісховішчы

Свята-Пакроўская царква — праваслаўны храм у аграгарадку Вейна Магілёўскага раёна Магілёўскай вобласці. Знаходзіцца ў цэнтры аграгарадка.

Гісторыя

Па адных дадзеных, пабудавана ў 2-й палове XVIII стагоддзя з цэглы. Паводле іншых крыніц, узведзена ў 1-й палове XIX стагоддзя. Занесена ў Дзяржаўны спіс гісторыка-культурных каштоўнасцей Рэспублікі Беларусь як аб’ект гісторыка-культурнай спадчыны рэспубліканскага значэння.

Архітэктура

Помнік архітэктуры класіцызму. Цэнтрычны будынак у плане блізкі да квадрата са скругленымі вугламі. У яго кампазіцыі дамінуе сферычны купал на круглым светлавым барабане. Вуглавыя часткі галоўнага фасада завершаны круглымі вежамі. Фасады раскрапаваны рызалітамі, завершанымі трохвугольнымі франтонамі. Па восях рызалітаў размешчаны вялікія нішы з лучковымі архівольтамі. У нішах з заходу і поўдня — уваходы, аздобленыя паўкалонамі і стральчатымі люкарнамі ў архівольтах. Пры галоўным уваходзе — вялікі драўляны прытвор.

Інтэр’ер

У інтэр'еры 4 магутныя слупы і перакінутыя цераз іх аркі трымаюць барабан і вылучаюць 8 бакавых больш нізкіх прасторавых частак, перакрытых скляпеннямі складанай канфігурацыі. У дэкоры фрэскавыя размалёўкі ў стылі класіцызму. Паміж вокнамі барабана ў медальёнах размешчаны выявы 4 евангелістаў, ніжэй, у рамных абрамленнях, — 4 шматфігурныя кампазіцыі на біблейскія сюжэты. Фрэскавай размалёўкай пакрыты скляпенні, бакавыя сцены алтара і сяродкрыжжа.

Літаратура

• Архітэктура Беларусі: Энцыклапедычны даведнік / Беларус. Энцыкл.; Рэкал.: А. А. Воінаў і інш. — Мн.: БелЭн, 1993. — 620 с. — 10 000 экз. — ISBN 5-85700-078-5. — С. 110
• Беларуская энцыклапедыя: У 18 т. Т. 4: Варанецкі — Гальфстрым / Рэдкал.: Г. П. Пашкоў і інш.. — Мн.: БелЭн, 1997. — Т. 4. — С. 62. — 480 с. — 10 000 экз. — ISBN 985-11-0090-0.
• Беларускі праваслаўны каляндар, 1997. — Мн., 1996. — С. 113.
• Збор помнікаў гісторыі і культуры Беларусі / АН БССР. Ін-т мастацтвазнаўства, этнаграфіі і фальклору; Рэд. кал.: С. В. Марцэлеў (гал. рэд.) і інш. — Мн.: БелСЭ, 1986. — Магілёўская вобласць. — 408 с., іл. — С. 287
• Праваслаўныя храмы Беларусі: энцыклапедычны даведнік / А. М. Кулагін; [рэдакцыйны савет: Г. П. Пашкоў, Л. В. Календа]. — Мінск: Беларуская Энцыклапедыя, 2007. — 653 с. 2000 экз. ISBN 978-985-11-0389-4.

Спасылкі

• Свята-Пакроўская царква (Вейна) на сайце Праваслаўная архітэктура Беларусі (бел.)
• Свята-Пакроўская царква (Вейна) на сайце Radzima.org
• Свята-Пакроўская царква (Вейна) на сайце Глобус Беларусі (руск.)
• Свята-Пакроўская царква (Вейна) на сайце «Архіварта»